1Pe 4 | MNA | STEP | Tana Krisi izem itunu, mi ibaada pataŋana ma ire yoyouŋana pa kuliini. Mi niom ta kembena. Kakam ŋgar kini tana ma iwe leyom. Naso iwe kembei mburu malmal kana be ipakaala yom pa toomboŋana. Pa tomtom ta so ibaada pataŋana mi ire yoyouŋana pa kuliini, na sanaana ko irao imboro i mini na som. Mi ko niini izze pa mbulu sananŋana mini som. Ko itoto Anutu leleene. Mi ko ikamam ta kembei ma irao swoono imap.

aRo 6:2,7,11, 12:2; 2Kor 5:15; Ga 2:20, 5:24; Ibr 12:1; 1Pe 2:21

bRo 13:12; Ep 2:2+, 4:17+; Tit 3:3

c1Pe 3:16

dŊgo 10:42; 2Tim 4:1; Yems 5:9

eRo 6:23, 8:10; 1Pe 3:19

fMt 24:13+; Lu 21:34; Ro 13:11+; Pil 4:5; 2Pe 3:9

gSnd 10:12; 1Kor 13:7; Kol 3:14; Ibr 13:1; 1Pe 1:22

hRo 12:13; 2Kor 9:7; Ibr 13:2

iMt 25:14; Ro 12:6+; 1Kor 12:7+; Ep 4:11+

j1Kor 3:10, 10:31

kŊgo 14:22; 2Tim 3:12; 1Pe 1:6+

lŊgo 5:41; Ro 8:17; Pil 3:10; Kol 1:24; 1Pe 1:5+; Tur 1:9

mMbo 89:50+; Mt 5:11, Mt 10:22; 1Pe 2:20

nPil 1:20

o2Tes 1:8

pSnd 11:31; Lu 23:31

qMbo 31:5; Lu 23:46; Ŋgo 7:59; 2Tim 1:12

1 Peter 4

Mbulu kizin wal tau tiwe popoŋan

1 Tana Krisi izem itunu, mi ibaada pataŋana ma ire yoyouŋana pa kuliini. Mi niom ta kembena. Kakam ŋgar kini tana ma iwe leyom. Naso iwe kembei mburu malmal kana be ipakaala yom pa toomboŋana. Pa tomtom ta so ibaada pataŋana mi ire yoyouŋana pa kuliini, na sanaana ko irao imboro i mini na som. Mi ko niini izze pa mbulu sananŋana mini som. Ko itoto Anutu leleene. Mi ko ikamam ta kembei ma irao swoono imap. ^a

3 Mbulu soroksorok tau zin wal matan munŋan lelen pa i, na niom kakam irao kek. Pa muŋgu karao be kayaraama ituyom som, mi niyom izze pa mbulu bozboozo. Ku'urur nol, kiwinin ma kakankaana, kakamam mailaŋ, kuluplup yom pa winŋana, mi kembesmbeeze pizin merere pakaamŋan tau tutu ki Anutu iŋgalsek pizin na. ^b

4 Mi koozi na, waeyom bizin tikamam ŋgar boozo piom. Pa iŋgi kagabgaaba zin ma niomŋan kolonloondo pa mbulu kizin sananŋan mini som. Tanata tiwirri sua sananŋan boozo piom. ^c

5 Tamen Tiiriŋana Katuunu tabe iur kadoono pizin wal meeteŋan mi wal matan yaryaaraŋan i, ni iurur mataana ma imbotmbot. Mi molo som to zin timender su kereene uunu, mi tiso uunu kizin kizin ma ileŋ. ^d

6 Mi Anutu, ni leleene be tomtom tikam mbotŋana mata yaryaaraŋana kembei ta ni itunu. Uunu tina ta wal kiti pakan tileŋ uruunu ambaiŋana muŋgu, mana timeete. Timeete paso, tomtom boozomen ki toono ti na, meeteŋana ta iwe len kadoono pa sanaana kizin. Mi wal tana kunun na, timbot matan yaryaara. ^e

Tuurpe itundu mi matanda iŋgal uraata ta Anutu iur mar namanda

7 Iŋgi koroŋ ta boozomen swon igarau kek. Tana kakam kat ŋgar, mi kagabiizi ituyom. Naso karao be kusuŋ kat. ^f

8 Mi mbulu ta ilip kat na, mbulu ki lelende par piti. Tana kikiskis kat mbulu tana. Pa ina ikam ti ma matanda imbiriizikaala sanaana boozomen ta tomtom tikamam piti na, ma takam ŋgar pa mini som. ^g

9 Mi mbulu ki leembe kamŋana na, niyom gesges pa pepe. Kakamam mi kikiskis. ^h

10 Anutu, ni ikampe yom, mi iur leyom uraata matakiŋa ta ki Bubuŋana i ma ikot yom tataŋa. Tana uraata pareiŋana ta so ni iur piom, na motoyom iŋgal be kakam mi ku'uulu zin tomtom pa. Naso kewe mbesooŋo ambaimbaiŋan ki Anutu, mi kewe zaala pa waeyom bizin be kampeŋana ki Anutu ise kizin. ⁱ

11 Tana sombe tomtom sa, ni le uraata be ikam sua ki Anutu pizin tomtom, na mataana iŋgal be iso Anutu sua kini men. Kokena izzo pa itunu ŋgar kini. Mi sombe tomtom sa, ni le uraata be imbeeze pizin tomtom, na bela ikam uraata tana pa mburaana ta imarmar pa Anutu na. Tana motoyom iŋgal be kakamam ta kembei. Naso mbulu tiom ta boozomen ikam zin tomtom ma tipakur Anutu pa Yesu Krisi zaana.

Krisi, ni zaana mi mburaana biibi. Mi ko imbotmbot ta kembei ma alok. Ŋonoono. ^j

Sombe tabaada pataŋana pa Krisi zaana, na lelende ipata pa pepe

12 O niom wal tio. Ŋonoono, iŋgi pataŋana sananŋana kat kembei ta you i itomtoombo urlaŋana tiom. Tamen kumurur pa pepe. Pa ina mbulu popoŋana som. ^k

13 Iŋgi kagaaba Krisi pa pataŋana kini. Tana leleyom ambai mi kabaada men. Mi kaimer, sombe ni iswe mburaana mi zaana biibi ma ipet kat mat, to niom ko leleyom ndabok ma ndabok kat. ^l

14 Sombe tipiri sua sananŋana piom pa uunu tau kezzwe Krisi zaana, na leleyom ambai men. Pa kampeŋana ki Anutu ko imbotmbot se tiom mi Anutu Bubuŋana ta izzwe mburaana piti i, ko imbotmbot raama yom. ^m

15 Mi kere. Kokena kupun tomtom sa ma imeete, som kekem, som kese leyom sua kizin wal pakan, som kakam mbulu sananŋana toro sa. Pa sombe tiseeze motoyom mi kabaada pataŋana pa uunu ta kembei, ina ambai som. Pa ina kapasaana Krisi uruunu. 16 Tamen sombe tomtom tikam pataŋana piom pa uunu tau kototo Krisi, na koyom miaŋ pa pepe. Niyom se mi leleyom ambai pa Anutu, mi kapakuri pa Krisi zaana ta ise tiom kek na. ⁿ

17 Iti wal ta tewe Anutu lene kek na, nol tabe ni itiiri iti pa mbulu kiti mi iur kadoono piti i, ta imar ipet kek. Pa ni isombe ikam piti muŋgu, mana ikam pizin wal pakan. Mi sombe ni itiiri iti pa mbulu kiti mi iur kadoono piti, inako parei pizin wal tau tizorzooro uruunu ambaiŋana ki Anutu? Ko timbot? Som. ^o

18 Pa sua ki Merere iso ta kembei:

Zin wal ndeeŋeŋan na, zaala tabe Anutu ikamke zin pa i, na ipata pizin be tito.
Mi so kembena, na parei pizin wal sananŋan tau tizorzooro Anutu na? Ko mbulu pareiŋana ipet pizin? ^p
19 Tana, sombe Anutu leleene be niom pakan kabaada pataŋana pa Krisi zaana, na motoyom iŋgal be kikiskis mbulu ambaiŋana, mi kuur ituyom ila ni namaana. Ni ko mataana piom. Pa ni ta iur yom, mi mataana iŋgalŋgal sua kini mbukŋana. ^q